(បន្ទាយមានជ័យ) ៖ នារសៀលថ្ងៃទី ០៤ ខែកក្កដា ឆ្នាំ២០២៣នេះ ឯកឧត្តម បណ្ឌិត សេរី កុសល អ្នកតំណាងរាស្ត្រខេត្តបន្ទាយមានជ័យ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបុណ្យអភិសេកព្រះពុទ្ធរូបអង្គធំ ក្នុងទីអារាមវត្តមុនីសាគរ (ហៅវត្តរហាល) ដែលស្ថិតនៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។
ក្នុងនោះ លោកបណ្ឌិត ឈឹម វាសនា ជាប្រធានក្រុមប្រឹក្សាភិបាលសមាគមយុវជនទិសអាគ្នេយ៍ និងមានវត្តមានឯកឧត្តម លោកជំទាវ ដែលជាទីប្រឹក្សារាជរដ្ឋាភិបាល ជាច្រើនរូបបានអញ្ជើញចូលរួមផងដែរ។
ដោយឡែក មានការនិមន្ត និងអញ្ជើញចូលរួម ព្រះសង្ឃ តាជី យាយជី សិស្សានុសិស្ស សមាជិក សមាជិកាសមាគម បងប្អូនប្រជាពលរដ្ឋ មហាពុទ្ធបរិស័ទ ជិតឆ្ងាយប្រមាណជាង៥០០អង្គ/នាក់ ក្នុងខេត្តបន្ទាយមានជ័យ ដែលធ្វើឲ្យពិធីនេះប្រកបដោយភាពសប្បាយរីករាយ និងមានការអបអរសាទរពីសំណាក់ប្រជាពលរដ្ឋក្នុងមូលដ្ឋានដោយភាពកក់ក្តៅយ៉ាងក្រៃលែង ឯកឧត្តម បណ្ឌិត សេរី កុសល បានលើកឡើងថាទាំងអស់នេះ កើតចេញឡើងបានដោយសារតែប្រទេសជាតិមានសុខសន្តិភាព ទើបមានការអភិវឌ្ឍសព្វគ្រប់បែបយ៉ាងក្រោមការដឹកនាំដ៏ឆ្លាតវៃប្រកបដោយកិត្តិបណ្ឌិតរបស់ប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចលោកបានលះបង់យកសាច់ស្រស់ ឈាមស្រស់ ដើម្បីប្តូរយកសុខសន្តិភាពមួយនេះជូនបងប្អូនប្រជាពលរដ្ឋកម្ពុជាទាំងមូល ។
ជាចុងបញ្ចប់ ឯកឧត្តម បណ្ឌិត សេរី កុសល បានធ្វើការអំពាវនាដល់បងប្អូនប្រជាពលរដ្ឋដែលមានឈ្មោះក្នុងបញ្ជីចុះឈ្មោះបោះឆ្នោត អញ្ជើញទៅបោះឆ្នោតឱ្យបានគ្រប់ៗគ្នា នាថ្ងៃទី ២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នា ៕
